Is die Bybel WAAR?

’n Vriend vra eendag of ek glo dat die Bybel die waarheid is.  Ek gebruik toe ’n dominee ontduikings tegniek en vra wat hý glo.  Sy antwoord was nee.

Later, toe ek weer oor die voorval dink, kom Pontius Pilatus se woorde by my op:  “Wat is waarheid?”  Die woord, “waarheid”, word dikwels gebruik om te verwys na dit wat met realiteit ooreenstem.  Waarheid is dan ’n feit wat met empiriese bewyse bevestig of verklaar kan word (bv. die aarde is rond).  Dan is daar ook “Waarheid” (met ’n hoofletter W) wat verwys na gevolgtrekkings tot metafisiese vrae soos God se bestaan en aard.  Waarheid wat nie bewys kan word nie, maar tog veronderstel word.

Dit lyk egter asof Jesus ’n derde verstaan van waarheid in gedagte het wanneer hy sê: “Ek is die waarheid.”  Jesus is die WAARHEID.  Anders as “waarheid” kan WAARHEID nie begryp of geken word nie – mens word deur die WAARHEID geken!  Anders as “Waarheid” gaan WAARHEID nie oor spekulasie nie – WAARHEID vind gestalte in vlees en bloed, brood en wyn.  Om die WAARHEID te ken is om geken te word en dit maak jou vry!  Om in die Bybel te glo, gaan dus nie oor kennis van ’n stel empiriese “waarhede” nie.  Dit gaan net so min oor die vashou aan metafisiese “Waarhede”.  Is Johannes nie dalk reg (1Joh. 4:7) wanneer hy sê: “Kom ons wees lief vir mekaar, want liefde kom van God.  Almal wat liefhet is van God gebore en ken vir God.”

’n Week of wat later sien ek weer my vriend.  Hy was besig om met deurnis met ’n oom te gesels wat onlangs sy vrou verloor het.  Ek kon die omgee in sy oë sien.  Dalk glo my vriend meer in die Bybel as wat hy dink?

Is die Bybel “waar”?  Bewys dit eers.  Is die Bybel “Waar”?  Wie weet?  Is die Bybel WAAR?  Jy sal weet wanneer dit is!

Grey Matters wandel deur die tuin

Die lede van Grey Matters het 8 Maart by by Rustenburg wynplaas, in hulle pragtige Schoongezicht tuin bymekaargekom om daardeur te wandel.  Die tema van die aand was Adam, Eva en die Tuin en die Genesis skeppingsverhale was die bladmusiek waarop ons gewandel het.

Die eerste beweging van ons wandel was rus.  ’n Oomblik van aanbidding aan die God wat rus (Gen. 1:31-2:3).  Rus is geëer as die kroon van God se skepping.  En hoe, vra jy?  Deur te rus natuurlik!

Beweging twee was ’n meditasie oor Gen. 2:9.  “Goed om te eet én mooi om na te kyk” was die bome wat God in die Tuin geplant het.  In teenstelling hiermee rus ons samelewing egter op die ontginning van die gebruikswaarde van die wêreld (goed om van te eet).  Iewers het ons vergeet: “Goed om te eet én mooi om na te kyk.”  Ons skryf toe elkeen dit wat vir ons mooi is neer.

Ons dink toe oor werk.  Kyk ons na werk deur die lens van die sondeval dan is dit: “In die sweet van jou aangesig sal jy jou brood verdien.”  Dit lyk egter asof Gen. 2:15 iets anders in gedagte gehad het: “Die Here God het die mens in die tuin laat woon om dit te bewerk en op te pas.”  Hier gaan dit oor genade, roeping en rentmeesterskap.  Sweet is maar ’n byproduk!

In beweging vier het ons voor Die Boom van Kennis van Goed en Kwaad kom kniel.  Nie om iets te pluk nie, maar om iets te gee.  Daarop het ons papiertjies met dit wat mooi is gehang as simbool dat dít genoeg is.  Ons hoef ons nie aan kennis of alwetendheid te vergryp nie.

Ons sluit toe af met ’n wandel deur die labirint om “te hoor hoe die Here God in die tuin wandel teen die tyd dat die aandwind opkom...” (Gen. 3:8).